„Аз, Буки, Веди“ – ученици од Yahya Kemal College | Tetovo Info

Промоција и во Тетово на документарниот филм „Аз, Буки, Веди – развој на македонскиот јазик“ изработен лани од тетовски средношколци

Во чест на 24 Мај, Денот на сесловенските просветители Свети Кирил и Методиј, вчеравечер се одржа свечена промоција на документарниот филм „Аз, Буки, Веди – развој на македонскиот јазик“ во Музеј на тетовски крај во Тетово.

Овој филм е дело на учениците Матеј Печеновиќ, Симон Стојановски и Марко Војноски заедно со професорките по предметот Македонски јазик и литература м-р Олгица Гаврилоска и м-р Јасмина Димитриеска, сите од колеџот ,,Јахја Кемал”- Тетово.Минатата година овој филм беше промовиран во Институтот за македонски јазик „Крсте Мисирков“ во Скопје и во Гостивар.

„Вчерашниот ден беше од особена важност, бидејќи се одбележа една година од првата официјална промоција на овој проект што се одржа во Институтот за македонски јазик „Крсте Мисирков“ во Скопје. Настанот се одржа во свечена и инспиративна атмосфера, во присуство на професори, ученици, пријатели – љубители на македонскиот јазик. Свое обраќање имаа менторките и нивните ученици кои пред присутните ги споделија искуствата од истражувањата и предизвиците со кои се соочија при создавањето на ова значајно документарно дело“ информираат авторите на документарецот.

Филмот опфаќа значајни етапи од развојот на македонскиот јазик, вклучувајќи интервјуа со истакнати научници и професори, автентични архивски материјали и оригинална музика.

„Филмот е доказ дека кога младите добиваат поддршка, инспирација и простор за креативен израз, можат да создадат дела што оставаат трага. „Аз, Буки, Веди“ не е само документарец. Тоа е глас на младите што ја раскажуваат приказната на еден јазик кој не престанува да живее. Јазикот е темел на нашиот идентитет и токму преку вакви дела, ја продолжуваме неговата приказна. Секој збор е мост кон иднината. Секоја мисла – доказ дека јазикот дише, зборува и нè повикува да го чуваме со љубов“, велат тетовските средношколци.

Во реализацијата на филмот учестуваа: режисери: Матеј Печеновиќ, Симон Стојановски, идеја: Симон Стојановски, сценаристи: Николина Ристовска, Симон Стојановски, Матеј Печеновиќ,камера: Меланија Николовска, Марко Војноски, Матеј Печеновиќ, монтажа: Марко Војноски, Матеј Печеновиќ, музика: Матеј Печеновиќ, Марко Војноски, боја: Марко Печеновиќ,техничка екипа: Марко Војноски, Симон Стојановски, наратор: Зоран Јовановски, изведувач: Матеј Печеновиќ. Говорители: проф. д-р Људмил Спасов, проф. д-р Елена Јованова-Грујовска, проф. д-р Лидија Тантуровска, проф. д-р Борче Арсов,м-р Антоанета Тримчевиќ. Поддржувачи на филмот: Институтот за македонски јазик „Крсте Мисирков“ од Скопје, Генералната дирекција на ПСУ „Јахја Кемал“ од Скопје и Управата на ПСУ „Јахја Кемал“ од Тетово.